Flenter-vlerke liefde

0 $

deur die vloedgolf van vele dae
het ons twee saam begin stap
en midde-in die veertigdae storm
het die tortel my vrede
met ‘n botselgroen olyftak aangebring

op die offertafel van jou liefde
het jy my die ram in die doringbos gewys
daar waar jy turend in die Braambos
kaalvoetspore van genade vir my skets

deur die waterskeiding van die Dooiesee
het jou stem die bitter Mara in my gebreek
en my hulpeloosheid droogvoets gedra
tot daar waar ons vas op droeëgrond staan

smagting het hongerig deur my hande geglip
terwyl jy sag die manna in my mond breek
het kwartels van die Skelfsee aangekom
en die vuurkolom het die donker gebreek

onder die rooitou van jou opregte liefde
en die ramshoring se sewedag basuin
het jy my Jerigomuur laat verkrummel
my dorstig water met my tong laat lek

daar waar die lewens-ashoop se riool
my vervaard na potskerwe wou laat gryp
omstandighede en mensdom my wreed verraai
het jy jou liefde in lendedoeke om my kom draai

dit was dan net so skuins na sonsopkoms
toe die Didimus diep-diep binne my
teësinnig (maar opreg) sy hoof buig
en so erkenning aan die flenter-vlerke
van jou (on)sienlike liefde gee

© Anzé Bezuidenhout

My verlatenheid huil

0 $

onder die geloei van die wind
waaier wolke deur kliptralies
soos droombesems waar hulle
teen die gekneusde horison
stilweg prentjies verf

deur die growwe klipvenster klink
my gesug soos monniksgebede
onder die son wat water trek
teen die blou-blou lug

die dink het my hier verloor
terwyl wind en sand
banaal tot in ewigheid
skommel en bly voortwoel

my verlatenheid huil
in somber kleure
(buite ‘n bekende
wentelbaan) waar
dit in bittertrane
losbreek en vlug

© Anzé Bezuidenhout

Jy is my vrede

0 $

waar jy my hare saggies in sterstof verf
het die maan jaloers gekyk
hoe die melkweg in spikkels
deur my oë tree

my vingers boetseer jou hart se klop
as jy ‘n duisend vuurvliegies inmekaarvleg
en dit laat sirkel om die skerfiemaan
tot dit in my hartklop kon anker gooi

die son van jou liefde het soos
‘n oranje appelkoos geskitter
en my getrek soos ‘n mot na ‘n kers
met my vlerke wiegend op die wind

in jou hitte het ek vrede gevind.

© Anzé Bezuidenhout

BESINNING

Soms kom die winter met sagte snikke

In die somerstof

En die bome skinder saam

Oor verskroeide lentedrome

 

Soms donder die wolke in malende woede

En streep die bliksems my met sambokhale

Totdat ek bibberend skuil

In die holtes van ‘n winterhart.

 

Eentonig en ysig is die inkeertyd

Gedagtes wat verkil

tot blinkwit sneeu van vergeet en verspoel

in strome droefheid oor die gisters

en môre se leegtes waar eens drome was.

©Rita Smit

16 Junie 2015.

 

Meer oor Koster

Uittreksel uit Straatligte in die mis:-

 

12. My Moeder

Ek sien my moeder glimlag uit die hemel vir my

Sy was die beste mamma op aarde te kry

Sy het ons laat opgroei om mekaar lief te hê

Die heel beste mamma kan ek met reg sê

 

Lees meer Meer oor Koster

Meer oor Moekie

0 $

                                                          Tweede kans

Hy het lelik drooggemaak. Soos wat hy al in sy lewe verbrou het, is dit geen wonder dis nou pay back time nie.

Gustavo van Zyl is ʼn gesogte vrygesel. Sy ouers het seker toentertyd al baie gelees om hom so ʼn nie-Afrikaanse naam te gee.

Vir jare het hierdie naam met sy eksotiese klank deure by die skoner geslag vir hom geopen. Net by die aanhoor van sy naam, nog voor hulle hom ontmoet het, swymel hulle al. Menige blind date het in ʼn ernstige verhouding ontaard. Maar trou en rustig raak? Aikona.

Lees meer Meer oor Moekie

DNS Woeker!

 

Sjoe (vr)ouens! Ek is nie seker wat en hoe dinge besig is om te gebeur nie ?! Dis absoluut fenomenaal.

Ek het presies 2 weke terug met die idee van die blog en ‘n blad vir elke skrywer begin. Van die 40 skrywers wat nou elk ‘n blad op die blog het – is omtrent 30 gelink aan splinter nuwe Fb Skryfblad.

Lees meer DNS Woeker!

Meer van Marsofine

Woorde wat waai

Marsofine se debuutbundel is pas vrygestel.

Sy het verskeie ATKV toekennings vir die gedigte in hierdie bundel ontvang.

Bestel hierdie “moet hê”  direk by haar teen 

N$ 150-00

Jy kan haar vonkpos by marsdrey@yahoo.com

of ‘n boodskap op hierdie blog los of op kontak haar op haar skryfblad

https://www.facebook.com/Marsofine-Skryf-163290104621296/

Meer van Martha

Boeke deur Martha Poller

Tuiskoms:

Bestaan uit kort stukkies wat op haar blog verskyn het.

Hagar:

‘n Bybelse roman oor die lewe van Hagar, Sara en Abraham.

Albei is uitgegee deur Malherbe Uitgewers en kan bestel word by die volgende skakel.

https://www.malherbe-uitgewers.co.za/martha-poller

Of los vir Martha ‘n boodskap op die blog of op haar blad onder Skrywers.

 

 

Sielsbede van ‘n man

 * Foto krediet – google

waar my oë
bakhand na jou staar
fontein die skelle wete
die son het in die siel
van jou oë gesterf en
jou skouers het
pikkewyn-dom
oor die westerkim
gestrompel
terwyl vreugde
binne jou gal braak
bly jou hande
in gebed geklem

ontrukking het
oor jou wange gedrup
en soos doudruppels
deur die hitte
van jou seer verdamp
genadestrale het
oor jou gebloei en
jou treurgreep het
bewend in ‘n lofsang
uitgebreek

© Anzé Bezuidenhout

My denke

* foto krediet – google

huilend wolf my verlange
oor die krom van die sekelmaan
aandblomreuke salf die
kneusings van my siel
terwyl bidwoorde fetus
op die hemel van my tong

blindelings
klingel windklanke
in braille deur die
heilige branders
van my denke
wat in algeblaar huil

dan kry my woorde
nuwe voetvlerke
en ry sorgloos
oor die pieke
van ‘n saffierwind

© Anzé Bezuidenhout

As die heelal huil

0 $

  (*foto krediet aan google)

smeltend huil die heelal
en vlerkloos het die skanse weggeval
as die kettings van vervloë sprokies
anker in vandag se treurverhaal
my treë dein oor lawastrome
verby die tralies in jou oë
wat onder woorde – grofgeskut –
ongeuiterd tussen ons kom lê

my verlange kerm hoonend
oor die kromming van die sekelmaan
en aandblomreuke bring salwing
soos botsels vir my siel
gebede fetus op die hemel van my tong
terwyl blinde windklanke klingellui in braille
en my somber denke spoed deur
die heil’ge branders van verset

dan draai ek bakhand na jou – my lief
want die son het dan reeds
in jou oë se siel gesterf
as jou vreugde bitter gal raak
kniel jy in wrang ontnugtering;
die vingers stram geklem
in die stille kreet
van jou gebed

© Anzé Bezuidenhout