Die Namib Skryf – sonder grense

Waar Afrikaans bymekaarkom

Kritiese Kommentaar

Dankie vir Kritiek:

Vandat ek die eerste keer iets op Namib Skryf gelees het, het ek tuis gevoel. Ek ken mos die dinge waarvan almal praat. Die talent het my stomgeslaan. Ek kan verreweg nie alles lees wat daagliks gepubliseer word nie, maar dit wat ek wel lees, is baie goed.

Ek het aangedui dat ek nie omgee indien my skryfwerk aan die kastyding en kommentaar van die lede en die professionele ontleders onderwerp word nie. My Granaatbos-gedig wat ek verlede week geplaas het (Anoniem) is van alle kante bygekom. Eina!


Maar! Vanoggend druk ek die kommentare uit en begin werk. Lees, voeg by, laat weg, spel reg, lees weer. Skryf oor, herrangskik, pluk-pluk hier aan ’n wegstaan woord en skaaf daar aan iets wat moeilik lees. En toe, so in medewerking, in aanneem en afwys, kry my gedig nuwe lewe.


Ek is nog nie heeltemal klaar nie, maar bitterlik opgewonde. Ek soek al so lank ’n skryfmaat wat my ’n duidelike riglyn sal gee van die goed en verkeerd, die reg en die sleg in my skryfwerk. Ek wil ’n klankbord hê wat ek weet my belang op die hart dra en my gedig beoordeel en nie my persoon, my hare of my bankrekening nie. Ek soek ook nie iemand wat doekvoet om my wals om my guns te behou nie. Boonop skryf ek alleen in ’n klein dorpie waar ek min mense ken en nog minder wat lesers of skrywers is. 


En hier tussen die woestyndigters en -skrywers kry ek presies die regte verhouding van simpatie en oordeel en gesonde verstand. Ek glo dat, indien jou skryfwerk jou erns is, dit kritiek verdien. Uit jou foute leer jy. As jy leer groei jy. As jy groei, skryf jy beter. En nog beter. Skryf is herskryf, oorskryf en weer skryf.
Dankie, almal wat die toer deur die granaatbos meegemaak het. ’n Loerie-veer aan elkeen van julle. 


Ek groet met die woorde van Breyten Breytenbach: “En as jou papier waterdig is, jou ink vol moed sal jou penne begin bewe in die bries en sal jou aardse vye woorde dra.” Uit: Hoe om ’n gedig te skryf onder vrugteboom in die reën. (1967)

Brechje Visagie

Related Posts

3 thoughts on “Kritiese Kommentaar

Maak 'n opvolg-bydrae

Jou e-posadres sal nie gepubliseer word nie.

Translate »